UDUME NGANI

Abanye baziwa ngezimbongi

Ezagiya ngosiba lanyakaza

Leli likaSenzangakhona kaJama

Kwakhala isalukazi sivuthela

Sathi bayazala abafazi

Waziwa ngani?

Abanye balwela inkululeko

Yombusazwe esiqhingini i-Robben

Bekhathele ukugqilazwa kwabamnyama

Intsha yahlala izithonto

Emaphoyiseni ngolimi lwesiBhunu

Waziwa ngani?

Abanye babonisa ubuqhawe

Balwa iNcome yayigazi

Balwa iSandlwana saphaphatheka

Bahlaba mahlanze eShiyane

Bevikela leli likaMthaniya

Waziwa ngani?

Abanye bakha imihlahlandlela

Abaningi bakha amabhuloho

Idlanzana laqinisa kojantshi

Abahlengikazi bonga kwasa

Abafundisi baqeketha bangama

Waziwa ngani?

NGOMILE

  Ngomile

Nsengwakazi okukade yayibancelisa

Ngiphuzise kwelimvemve

Ngiphuzise kolumnandi uju

Ngiph’ engingenakuliphucwa muntu

Oluyifa laphakade

Mangaki amankonyane osuwancelisile

Mingaki imivemve owayincelisa maqede yavulek’izingqondo

Nsengwakazi ngikanye nemivemve yakho

Ngikhuhlwe inkungu yokungazi

Ngiphuzise kolwamaqhawe akho

Ngihole ngengalo uze uyongingenisa ezikhungweni zenzululwazi

Lapho ngiyotshakadula izinkalo namathafa

Ngitshakadule ubusuku nemini

Ngizilungisel’ukunqoba ubumnyama

Ngiphume sengihlomis’okukaNodumehlezi kaMenzi